Kənd turizminin inkişafı ilə əlaqədar olaraq kənd sakinləri ilə maarifləndirici görüş keçirilmişdir

Ətraflı

Nəşr edilib 03.08.2022 13:52

Baxış sayı: 760

3 avqust 2022-ci il tarixdə Şərur  rayonunun Şahbulaq  kəndində kənd turizminin inkişafı məqsədilə Şərur rayon Şahbulaq kənd sakinləri ilə görüş keçirilmişdir. Tədbirdə çıxış edən Şərur rayon İcra Hakimiyyətinin nümayəndəsi Kamal İsmayilov bildirmişdir ki, çox geniş yayılmış kənd turizmi üçün muxtar respublikanın bütün kəndlərində müasir tələblərə cavab verən yüksək şərait vardır. Tarixinin qədimliyi, təbiətinin rəngarəngliyi, mətbəxinin zənginliyi və insanların qonaqpərvərliyi kimi müsbət keyfiyyətləri bu kəndlərdə kənd yaşıl turizminin geniş inkişaf imkanlarından xəbər verir. Mövcud sosial infrastruktur əhalinin həyat səviyyəsinin və məşğulluğunun yüksəldilməsi nəticəsində komfortlu həyat tərzinə keçid də surətlənir ki, bu da xüsusən isti yay günlərində öz tətilini səfalı dağ kəndlərində keçirmək istəyənlərin sayını artırır.

Daha sonra Naxçıvan Muxtar Respublikası Turizm Departamentinin Turizmin inkişafı və təbliği sektorunun baş məsləhətçisi Elşən Mehralıyev çıxış edərək bildirmişdir ki, muxtar respublikada dövlət səviyyəsində turizm sahəsinə göstərilən diqqət və qayğı bu sahənin inkişafına əsaslı təsir etmişdir. Bu gün muxtar respublikanın ən ucqar dağ kəndlərinə belə, rahat asfalt yollar salınmış, su xətləri çəkilmiş, müasir infra­struktur obyektləri tikilmiş, fasiləsiz təbii qaz, elektrik enerjisi, rabitə xidməti və sürətli internet şəbəkəsi istifadəyə verilmişdir. Qeyd etmişdir ki, muxtar respublikada bərəkətli torpaq, saf su, təmiz hava, zəngin dərman bitkiləri, bol günəşin mövcudluğu burada ekoloji turizmin inkişafı üçün geniş imkanlar açır. Qədim diyarın Biçənək, Kükü, Ağbulaq, Nursu, Keçili, Xanəgah, Dırnıs, Anaqut, Nəsirvaz, Bist, Tivi, Şahbulaq, Gümüşlü, Ərəfsə və başqa yaşayış məntəqələri kənd yaşıl turizminin inkişafı üçün səciyyəvi xüsusiyyətlərə malikdirlər. Məruzəçi bildirmişdir ki, şəhərin səs-küyündən uzaq, fərqli mühitdə dincəlmək istəyənlər adətən kənd turizminə üstünlük verirlər.

Məruzəçi kənd sakinlərinin diqqətinə çatdırmışdır ki, kəndlərdə kirayə verilən evlərin siyahısı və fotoları Naxçıvan Turizm İnformasiya Mərkəzinin İnternet saytında “Hostelər və kirayə verilən evlər” bölməsində yerləşdirilir. Həmçinin bu bölmədə kirayə verilən obyektin tipi, yerləşdiyi rayon və kənd, sahibkarın əlaqə nömrələri, obyekt haqqında ətraflı məlumat və digər qeydlər yer alır. Bütün bu məlumatların yerləşdirilməsi nəticəsində, internet üzərində  axtarış edən qonaqlar tərəfindən, kənd evlərinin sahibləri ilə birbaşa əlaqə yaratması imkanı yaranır. Naxçıvan Turizm İnformasiya Mərkəzinin İnternet saytı kəndə gələn qonaqlarla, kənd evlərinin sahibləri arasında bir növ vasitəçi rolunu oynayır.

Naxçıvan Muxtar Respublikası Turizm Departamentinin Statistika və sertifikatlaşdırma sektorunun aparıcı məsləhətçisi Ruslan Rəhimli çıxış edərək bildirmişdir ki, son illər bütün dünyada olduğu kimi muxtar respublikda da kənd turizmi geniş vüsət alıb. Getdikcə daha çox insan öz istirahətini fərqli formada keçirməyə üstünlük verir, kurortlar, böyük şəhərlər,  mehmanxanalar əvəzinə kənd  və  kənd evlərində dincəlməyi üstün tutur. Bununla yanaşı şəhərlərin ekoloji problemləri, hava çirkliliyi, sənaye üsulu ilə hazırlanan ərzaqlarla qidalanma insanlarda öz təbiiliyini, təmizliyini qoruyan kənd yerlərinə ehtiyacı artırır.

Həmçinin məruzəçi qonaqların qarşılanması, kənd  evində qonaqlama xidmətinin təşkili, kənd evində qonaqlama xidməti üçün tələblər, qonaqların məmnunluğunun təmin edilməsi, qidalanmanın təşkili, ev sahibləri tərəfindən əlavə xidmətlər göstərilməsi və təhlükəsizlik qaydaları haqqında zəruri məlumatları tədbir iştirakçılarının diqqətinə çatdırmışdır.

Məruzəçi qeyd etmişdir ki, dövlət tərəfindən kənd turizminin inkişafına göstərilən diqqət və qayğının nəticəsidir ki, son dövrlər muxtar respublikada müxtəlif istirahət mərkəzləri istifadəyə verilir. Bu ilin may ayında açılış mərasimi keçirilən Ordubad rayonunun Anaqut kəndində “Xan Çinar” istirahət mərkəzi və Culfa rayonunun Ləkətağ kənd sakininin kənddə Əlincə çayının keçdiyi ərazidə – çay sahilində yaratdığı kiçik bir istirahət kompleksində yerli və əcnəbi turistlərə müxtəlif xidmətlər göstərilir.

Bütün dünyada olduğu kimi, muxtar respublikada də kənd evlərində qonaqlama xidmətinə böyük maraq və tələbat müşahidə olunur. Bunu nəzərə alaraq evini turistlərə kirayəyə vermək istəyən şəxslər Naxçıvan Muxtar Respublikasının Turizm Departamentinə və ya aidiyyəti kənd icra nümayəndəliyinə müraciət edə bilərlər.

Tədbirin sonunda kənd sakinlərini maraqlandıran suallar cavablandırılmış və  tədbir iştirakçılarına muxtar respublikanın turizm potensialını özündə əks etdirən bukletlər təqdim olunmuşdur.

• < Geri
• İrəli >