"Azərbaycanın təbiəti və Azərbaycanda
olan bütün başqa infrastruktur buna
imkan verir ki, ölkəmizə turistlər gəlsinlər"

Heydər Əliyev

 

 

 

 

“Naxçıvan – bəşəriyyətin beşiyi” IV Beynəlxalq Rəsm Festivalının açılışı olmuşdur

Mayın 23-də Naxçıvan şəhərindəki Əcəmi Seyrəngahı Mədəniyyət və İstirahət Parkında ümummilli lider Heydər Əliyevin anadan olmasının 95 illiyinə həsr olunmuş “Naxçıvan – bəşəriyyətin beşiyi” IV Beynəlxalq Rəsm Festivalının açılış mərasimi keçirilmişdir.

Tədbirdə Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov çıxış edərək bildirmişdir ki, Naxçıvan Muxtar Respublikası Ali Məclisi Sədrinin 2018-ci il 16 aprel tarixli Sərəncamı ilə təsdiq edilən “Ümummilli lider Heydər Əliyevin anadan olmasının 95 illiyinin Naxçıvan Muxtar Respublikasında keçirilməsinə dair Tədbirlər Planı”na uyğun olaraq muxtar respublikada silsilə tədbirlər keçirilir. “Naxçıvan – bəşəriyyətin beşiyi” IV Beynəlxalq Rəsm Festivalı da Naxçıvan Muxtar Respublikası Ali Məclisi Sədrinin 2018-ci il 16 aprel tarixli Sərəncamı ilə təsdiq edilən həmin Tədbirlər Planına uyğun olaraq keçirilir. 

Qeyd olunmuşdur ki, Azərbaycanda mədəniyyətin, incəsənətin, o cümlədən təsviri sənətin inkişafı ümummilli lider Heydər Əliyevin adı və dövlətçilik fəaliyyəti ilə bağlıdır. Ulu öndərin ölkəmizə rəhbərliyi dövründə mədəniyyətin və təsviri sənətin inkişafına xüsusi qayğı göstərilmiş, çoxsaylı mədəniyyət mərkəzləri, sərgi salonları yaradılmış, rəssamlıq sahəsində yaradıcılıq prosesi geniş vüsət almışdır. 

Diqqətə çatdırılmışdır ki, bu gün ölkəmizdə, eləcə də Naxçıvan Muxtar Respublikasında ümummilli liderimiz Heydər Əliyevin mədəniyyət və incəsənət sahəsində əsasını qoyduğu ənənələr davam etdirilir, yaradıcı şəxslərə dəstək verilir, zəngin keçmişə malik olan rəssamlıq məktəbinin qorunub saxlanılması və inkişafı üçün tədbirlər görülür. Muxtar respublikada istedadlı gənc rəssamların üzə çıxarılması və onların bu sənəti daha dərindən öyrənmələri diqqətdə saxlanılmış, Naxçıvan Dövlət Universitetinin İncəsənət fakültəsində Təsviri incəsənət və rəsmxətt, Naxçıvan Müəllimlər İnstitutunda Təsviri incəsənət müəllimliyi ixtisasları açılmış, məktəbdənkənar təhsil müəssisələrində isə rəsm dərnəklərinin fəaliyyətləri üçün zəruri şərait yaradılmışdır. Ümummilli lider Heydər Əliyevin anadan olmasının 95 illiyinə həsr olunmuş “Naxçıvan – bəşəriyyətin beşiyi” IV Beynəlxalq Rəsm Festivalının yüksək səviyyədə təşkil olunması da muxtar respublikada təsviri incəsənətə qayğının ifadəsidir. Rəsm festivalında 35-i 12 xarici ölkədən olmaqla, ümumilikdə, 65-dən çox fırça ustasının iştirak etməsi bu beynəlxalq tədbirin əhəmiyyətini daha da artırır. 

Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Rəhman Məmmədov “Naxçıvan – bəşəriyyətin beşiyi” IV Beynəlxalq Rəsm Festivalının rəssamlar üçün əhəmiyyətli olacağını bildirmiş, iştirakçılara uğurlar arzulamışdır.

Azərbaycan Rəssamlar İttifaqının sədri, Xalq rəssamı Fərhad Xəlilov muxtar respublikanın ötən illər ərzində çox böyük inkişaf yolu keçdiyini, müasirliyi ilə gözoxşayan Naxçıvan şəhərinin yenidən qurulduğunu, qədim diyarda rəssamların fəaliyyəti üçün hər cür şərait yaradıldığını vurğulamışdır. “Naxçıvan – bəşəriyyətin beşiyi” IV Beynəlxalq Rəsm Festivalının keçirilməsinin muxtar respublika üçün mühüm mədəni hadisə olduğunu deyən Fərhad Xəlilov yaradılan şəraitə görə festival iştirakçıları adından Naxçıvan Muxtar Respublikası Ali Məclisinin Sədrinə minnətdarlığını bildirmişdir.

Naxçıvan Muxtar Respublikasının mədəniyyət naziri Natəvan Qədimova bildirmişdir ki, muxtar respublikada milli-mənəvi dəyərlərə hörmətlə yanaşılır, dini dəyərlər və adət-ənənələr qorunub saxlanılır. Bütün bunların nəticəsidir ki, Naxçıvan şəhəri 2018-ci il üçün İslam Mədəniyyətinin Paytaxtı seçilmişdir. Bununla yanaşı, Naxçıvan şəhəri həm də 2018-ci il üçün ölkəmizin Gənclər Paytaxtıdır. Belə bir əlamətdar ildə Naxçıvan şəhərində ümummilli lider Heydər Əliyevin anadan olmasının 95 illiyinə həsr olunmuş “Naxçıvan – bəşəriyyətin beşiyi” IV Beynəlxalq Rəsm Festivalının keçirilməsi qədim diyarımızın zəngin tarixi və bu günü ilə səsləşən mühüm mədəniyyət tədbiridir.

Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva çıxışında bildirmişdir ki, bu gün təsviri sənətin inkişafı sahəsində muxtar respublikada ardıcıl tədbirlər görülür, gənc rəssamların formalaşması, rəssamlıq sənətinin tədrisi üçün hərtərəfli şərait yaradılır, fırça ustalarının yaradıcılıq imkanları artırılır. Rəssamların fərdi sərgilərinin təşkil edilməsi, Azərbaycan boyakarlıq sənətinin klassik və müasir nümayəndələrinin albom-kataloqlarının hazırlanıb nəşr etdirilməsi gənc rəssamların yaradıcılıq axtarışlarının artmasına mühüm töhfə verir. Yaradılan şərait rəssamların yaradıcılıq imkanlarının daha da genişlənməsinə səbəb olmuş, naxçıvanlı rəssamların dünyanın bir çox ölkələrində sərgiləri açılmış, onlar beynəlxalq festival və müsabiqələrdə iştirak etmişlər. 

Qeyd olunmuşdur ki, bu gün qədim Naxçıvan böyük quruculuq meydanına çevrilib. Həyata keçirilən quruculuq nümunələri gələcək üçün böyük tarixdir. Bu tarix təkcə mütəxəssis tədqiqatlarının deyil, eləcə də yaradıcı insanların əsərlərində də gələcək nəsillərə çatdırılmalıdır. Ümummilli lider Heydər Əliyevin anadan olmasının 95 illiyinə həsr olunmuş “Naxçıvan – bəşəriyyətin beşiyi” IV Beynəlxalq Rəsm Festivalının keçirilməsi də bu məqsədə xidmət edir. 

Tədbirin bədii hissəsində Qədim Musiqi Alətləri Ansamblının, Naxçıvan Dövlət Filarmoniyasının rəqs qrupunun, Naxçıvan Muxtar Respublikası Aşıqlar Birliyinin üzvlərinin və Şərur Xalq Yallı Ansamblının çıxışları olmuşdur. 
Sonra festivalın yaradıcılıq hissəsinə başlanılmışdır. Tədbirin gedişində iştirakçılara səyyar iaşə xidməti göstərilmişdir.

Naxçıvan Dövlət Universitetinin İncəsənət fakültəsinin, Naxçıvan Müəllimlər İnstitutunun Təsviri incəsənət müəllimliyi ixtisasının müəllim və tələbələri, Heydər Əliyev Uşaq-Gənclər Yaradıcılıq Mərkəzinin rəsm dərnəyinin üzvləri, Ərtoğrol Cavid adına Uşaq Musiqi və Bədii Sənətkarlıq məktəbinin şagirdləri tanınmış rəssamların iş proseslərini izləmişlər.

Qeyd edək ki, mayın 24-də Bəhruz Kəngərli adına Sərgi Salonunda festivalda çəkilmiş əsərlərdən ibarət sərgi təşkil ediləcəkdir.

 Səbuhi HƏSƏNOV

"Şərq qapısı" qəzeti

 

00238143
Bu gün
Dünən
Bu həftə
Bu ay
Ümumi
396
417
813
8516
238143

Tarix: 19-06-2018
Biz, sosial şəbəkələrdə: